ನವದೆಹಲಿ: ಆಕ್ರಮಣಕಾರಿ ಕ್ಯಾನ್ಸರ್‌ಗಳಿಗೆ ಹೊಸದಾಗಿ ಅಭಿವೃದ್ಧಿಪಡಿಸಿದ ಇಮ್ಯುನೊಥೆರಪಿ ಔಷಧವು ಪ್ರಾಥಮಿಕ ಹಂತದ (ಹಂತ-1) ಪ್ರಯೋಗಗಳಲ್ಲಿ ಉತ್ತಮ ಫಲಿತಾಂಶ ತೋರಿಸಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
ಕ್ಯಾನ್ಸರ್ ಚಿಕಿತ್ಸೆಗೆ ಬಳಸುವ CD40 ಅಗೋನಿಸ್ಟ್ ಪ್ರತಿಕಾಯಗಳು ಪ್ರಾಣಿಗಳಲ್ಲಿ ಪರಿಣಾಮಕಾರಿ ಎನ್ನಿಸಿಕೊಂಡಿದ್ದರೂ, ಮಾನವರಲ್ಲಿ ತೀವ್ರ ಅಡ್ಡಪರಿಣಾಮಗಳಿಂದಾಗಿ ಸೀಮಿತ ಯಶಸ್ಸು ಕಂಡಿದ್ದವು. ಆದರೆ, ಅಮೆರಿಕದ ರಾಕ್‌ಫೆಲ್ಲರ್ ವಿಶ್ವವಿದ್ಯಾಲಯದ ತಂಡವು 2141-V11 ಎಂಬ ಹೆಸರಿನ ಹೊಸ ಆವೃತ್ತಿಯನ್ನು 2018ರಲ್ಲಿ ಅಭಿವೃದ್ಧಿಪಡಿಸಿತ್ತು.
ಇತ್ತೀಚೆಗೆ ಪ್ರಕಟವಾದ ಕ್ಲಿನಿಕಲ್ ಪ್ರಯೋಗದಲ್ಲಿ 12 ಮಂದಿಯ ಮೇಲೆ ಪರೀಕ್ಷೆ ನಡೆಸಲಾಗಿದ್ದು, ಆರು ಮಂದಿಯಲ್ಲಿ ಗೆಡ್ಡೆಗಳು ಕುಗ್ಗಿದವು, ಇಬ್ಬರಲ್ಲಿ ಸಂಪೂರ್ಣವಾಗಿ ಕಣ್ಮರೆಯಾದವು. ಮೆಮೋರಿಯಲ್ ಸ್ಲೋನ್ ಕೆಟರಿಂಗ್ ಕ್ಯಾನ್ಸರ್ ಸೆಂಟರ್‌ನ ತಜ್ಞ ಜುವಾನ್ ಒಸೊರಿಯೊ ಹೇಳುವಂತೆ, “ಇಷ್ಟು ಕಡಿಮೆ ಸಂಖ್ಯೆಯ ರೋಗಿಗಳಲ್ಲೇ ಇಂತಹ ಉಪಶಮನ ಗಮನಾರ್ಹ.”
ಸಾಮಾನ್ಯವಾಗಿ ಚುಚ್ಚುಮದ್ದು ಮಾಡಿದ ಸ್ಥಳದಲ್ಲೇ ಪರಿಣಾಮ ನಿರೀಕ್ಷಿಸಲಾಗುತ್ತದಾದರೂ, ಈ ಔಷಧವು ದೇಹದ ಬೇರೆಡೆ ಇರುವ ಗೆಡ್ಡೆಗಳ ಮೇಲೆಯೂ ಪ್ರಭಾವ ಬೀರಿದೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ. ಇದನ್ನು “ಅನಿರೀಕ್ಷಿತವಾದರೂ ಅತ್ಯಂತ ಮಹತ್ವದ ಫಲಿತಾಂಶ” ಎಂದು ಅಧ್ಯಯನದ ಮುಖ್ಯ ಸಂಶೋಧಕ ಜೆಫ್ರಿ ವಿ. ರಾವೆಚ್ ತಿಳಿಸಿದ್ದಾರೆ.
ಮೆಲನೋಮ, ಮೂತ್ರಪಿಂಡ ಕೋಶ ಕಾರ್ಸಿನೋಮ ಹಾಗೂ ಸ್ತನ ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆಗಳಿಂದ ಬಳಲುತ್ತಿದ್ದ ರೋಗಿಗಳಲ್ಲಿ ಯಾವುದೇ ತೀವ್ರ ಅಡ್ಡಪರಿಣಾಮ ಕಂಡುಬಂದಿಲ್ಲ. ಮೆಲನೋಮ ಮತ್ತು ಸ್ತನ ಕ್ಯಾನ್ಸರ್ ಹೊಂದಿದ್ದ ಇಬ್ಬರು ರೋಗಿಗಳು ಸಂಪೂರ್ಣ ಗುಣಮುಖರಾದರು.
ಈ ನವೀಕರಿಸಿದ ಇಮ್ಯುನೊಥೆರಪಿ ಔಷಧವು ಭವಿಷ್ಯದಲ್ಲಿ ಆಕ್ರಮಣಕಾರಿ ಕ್ಯಾನ್ಸರ್‌ಗಳಿಗೆ ನವೀನ ಚಿಕಿತ್ಸೆ ನೀಡುವ ಭರವಸೆಯನ್ನು ಮೂಡಿಸಿದೆ.