ವಾಷಿಂಗ್ಟನ್: ಅಮೆರಿಕ ಆಡಳಿತವು ಇಸ್ರೇಲ್ (Israel), ಕತಾರ್ (Qatar), ಕುವೈತ್ (Kuwait) ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ (United Arab Emirates) ಗೆ 8.6 ಬಿಲಿಯನ್ ಯುಎಸ್ ಡಾಲರ್ಗಿಂತ ಹೆಚ್ಚಿನ ಮೌಲ್ಯದ ಶಸ್ತ್ರಾಸ್ತ್ರ ಮಾರಾಟಕ್ಕೆ ಕಾಂಗ್ರೆಸ್ ಪರಿಶೀಲನೆಯನ್ನು ಬದಿಗೊತ್ತಿ ಅನುಮೋದನೆ ನೀಡಿದೆ.
ಅಮೆರಿಕದ ವಿದೇಶಾಂಗ ಇಲಾಖೆಯ ಪ್ರಕಾರ, ಈ ಪ್ಯಾಕೇಜ್ನಲ್ಲಿ ಸುಧಾರಿತ ನಿಖರತೆಯ ದಾಳಿ ಶಸ್ತ್ರಾಸ್ತ್ರ ವ್ಯವಸ್ಥೆಗಳು, ವಾಯು ಮತ್ತು ಕ್ಷಿಪಣಿ ರಕ್ಷಣಾ ಮರುಪೂರಣ ಸೇವೆಗಳು ಹಾಗೂ ಸಂಯೋಜಿತ ಯುದ್ಧ ಕಮಾಂಡ್ ವ್ಯವಸ್ಥೆಗಳು ಸೇರಿವೆ.
ಇದರ ನಡುವೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಇರಾನ್ ವಿರುದ್ಧದ ಯುದ್ಧ “ಮುಕ್ತಾಯಗೊಂಡಿದೆ” ಎಂದು ಕಾಂಗ್ರೆಸ್ಗೆ ತಿಳಿಸಿದ್ದಾರೆ.
ಕಾಂಗ್ರೆಸ್ ನಾಯಕರಿಗೆ ಬರೆದ ಪತ್ರದಲ್ಲಿ, “2026ರ ಏಪ್ರಿಲ್ 7ರಿಂದ ಅಮೆರಿಕ ಮತ್ತು ಇರಾನ್ (Iran) ನಡುವೆ ಯಾವುದೇ ಗುಂಡಿನ ವಿನಿಮಯ ನಡೆದಿಲ್ಲ. ಫೆಬ್ರವರಿ 28ರಂದು ಆರಂಭವಾದ ಹಗೆತನಗಳು ಕೊನೆಗೊಂಡಿವೆ” ಎಂದು ಅವರು ತಿಳಿಸಿದ್ದಾರೆ.
1973ರ ಯುದ್ಧ ಅಧಿಕಾರ ನಿರ್ಣಯದ ಪ್ರಕಾರ, ಅಧ್ಯಕ್ಷರು ಕಾಂಗ್ರೆಸ್ಗೆ ಮಾಹಿತಿ ನೀಡಿದ ಬಳಿಕ 60 ದಿನಗಳೊಳಗೆ ಮಿಲಿಟರಿ ಕ್ರಮವನ್ನು ಅಂತ್ಯಗೊಳಿಸಬೇಕು ಅಥವಾ ಕಾಂಗ್ರೆಸ್ನ ಅನುಮೋದನೆ ಪಡೆಯಬೇಕು. ಈ ಕಾನೂನು ಗಡುವು ತಲುಪಿದ ಹಿನ್ನೆಲೆಯಲ್ಲಿ ಟ್ರಂಪ್ ಈ ಘೋಷಣೆ ಮಾಡಿದ್ದಾರೆ.
ಆದರೆ, ಇರಾನ್ ಜೊತೆಗಿನ ಮಾತುಕತೆಗಳು ಇನ್ನೂ ಅನಿಶ್ಚಿತವಾಗಿವೆ ಎಂದು ಟ್ರಂಪ್ ಹೇಳಿದ್ದಾರೆ. “ಅವರು ಒಪ್ಪಂದ ಬಯಸುತ್ತಿದ್ದಾರೆ. ಆದರೆ ಈಗಿನ ಪ್ರಸ್ತಾಪಗಳಿಂದ ನನಗೆ ತೃಪ್ತಿ ಇಲ್ಲ. ಮುಂದೇನು ಆಗುತ್ತದೆ ನೋಡಬೇಕು,” ಎಂದು ಅವರು ತಿಳಿಸಿದ್ದಾರೆ.