ನವದೆಹಲಿ: ಭಾರತ ಎಲೆಕ್ಟ್ರಾನಿಕ್ಸ್ ಉತ್ಪಾದನೆಯಲ್ಲಿ ಮಹತ್ವದ ಸಾಧನೆ ಮಾಡಿದ್ದು, ವಿಶ್ವದ ಎರಡನೇ ಅತಿದೊಡ್ಡ ಮೊಬೈಲ್ ಫೋನ್ ತಯಾರಕ ರಾಷ್ಟ್ರವಾಗಿ ಹೊರಹೊಮ್ಮಿದೆ. ಸ್ಮಾರ್ಟ್ಫೋನ್ಗಳು ದೇಶದ ಅತಿದೊಡ್ಡ ರಫ್ತು ಉತ್ಪನ್ನವಾಗಿ ದಾಖಲೆ ನಿರ್ಮಿಸಿವೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
2014-15ರಲ್ಲಿ ₹1.9 ಲಕ್ಷ ಕೋಟಿ ಇದ್ದ ಎಲೆಕ್ಟ್ರಾನಿಕ್ಸ್ ಉತ್ಪಾದನೆ 2025-26ರಲ್ಲಿ ₹13.11 ಲಕ್ಷ ಕೋಟಿಗೆ ಏರಿಕೆಯಾಗಿದೆ. ಇದೇ ಅವಧಿಯಲ್ಲಿ ರಫ್ತುಗಳು ₹4.24 ಲಕ್ಷ ಕೋಟಿಗೆ ಏರಿಕೆಯಾಗಿದ್ದು, ಮೊಬೈಲ್ ಫೋನ್ ರಫ್ತು ಮಾತ್ರ ₹2.6 ಲಕ್ಷ ಕೋಟಿ ತಲುಪಿದೆ.
ಕಳೆದ ದಶಕದಲ್ಲಿ ಈ ವಲಯದಲ್ಲಿ 25 ಲಕ್ಷ ಉದ್ಯೋಗಗಳು ಸೃಷ್ಟಿಯಾಗಿದ್ದು, ಮೊಬೈಲ್ ಉತ್ಪಾದನಾ ವಲಯದಲ್ಲೇ 12 ಲಕ್ಷ ನೇರ ಮತ್ತು ಪರೋಕ್ಷ ಉದ್ಯೋಗಗಳು ಲಭಿಸಿವೆ. ನೇರ ಕಾರ್ಯಪಡೆಯ ಸುಮಾರು 70% ಮಹಿಳೆಯರು ಎಂಬುದು ವಿಶೇಷ.
ತಮಿಳುನಾಡಿನ ಹೊಸೂರು, ಶ್ರೀಪೆರಂಬದೂರು ಹಾಗೂ ಕರ್ನಾಟಕದ ಬೆಂಗಳೂರಿನ ಮೊಬೈಲ್ ಉತ್ಪಾದನಾ ಘಟಕಗಳು ಸೇರಿ ಒಂದು ಲಕ್ಷಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿವೆ.
ಮೊಬೈಲ್ ಫೋನ್ ಉತ್ಪಾದನೆ 2014-15ರ ₹18,900 ಕೋಟಿಯಿಂದ 2025-26ರಲ್ಲಿ ₹6.27 ಲಕ್ಷ ಕೋಟಿಗೆ ಏರಿಕೆಯಾಗಿದ್ದು, ರಫ್ತುಗಳು 165 ಪಟ್ಟು ಹೆಚ್ಚಾಗಿವೆ.
ಪಿಎಲ್ಐ ಯೋಜನೆಯಡಿ ₹20,600 ಕೋಟಿಗೂ ಅಧಿಕ ಹೂಡಿಕೆ ಆಕರ್ಷಿಸಲಾಗಿದ್ದು, ₹11.62 ಲಕ್ಷ ಕೋಟಿ ಉತ್ಪಾದನೆ ಮತ್ತು ₹6.53 ಲಕ್ಷ ಕೋಟಿ ರಫ್ತು ದಾಖಲಾಗಿದೆ.
ದೇಶೀಯ ಮೌಲ್ಯವರ್ಧನೆ 15%ರಿಂದ 23%ಕ್ಕೆ ಏರಿಕೆಯಾಗಿದ್ದು, ‘ಮೇಕ್ ಇನ್ ಇಂಡಿಯಾ’ ಮತ್ತು ‘ಆತ್ಮನಿರ್ಭರ್ ಭಾರತ್’ ಗುರಿಗಳಿಗೆ ಎಲೆಕ್ಟ್ರಾನಿಕ್ಸ್ ವಲಯ ಪ್ರಮುಖ ಬಲವಾಗಿದೆ ಎಂದು ಸರ್ಕಾರ ತಿಳಿಸಿದೆ.