ನವದೆಹಲಿ: ಟೆಲಿಕಾಂ ಮತ್ತು ಬ್ರಾಡ್ಬ್ಯಾಂಡ್ ಸೇವೆಗಳ ಗುಣಮಟ್ಟವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (TRAI) ಸೇವಾ ಗುಣಮಟ್ಟ (QoS) ನಿಯಮಗಳಿಗೆ ತಿದ್ದುಪಡಿ ಪ್ರಸ್ತಾಪಿಸಿ ಸಮಾಲೋಚನಾ ಪತ್ರ ಬಿಡುಗಡೆ ಮಾಡಿದೆ.
ಪ್ರಸ್ತಾವಿತ ತಿದ್ದುಪಡಿಗಳು ಸೇವೆ ಒದಗಿಸುವ ಅನುಭವ, ಪಾಲುದಾರರ ಸಲಹೆಗಳು, ತಾಂತ್ರಿಕ ಪ್ರಗತಿ ಹಾಗೂ ಉತ್ತಮ ಗುಣಮಟ್ಟದ ಡಿಜಿಟಲ್ ಸಂಪರ್ಕಕ್ಕಾಗಿ ಹೆಚ್ಚುತ್ತಿರುವ ಗ್ರಾಹಕರ ನಿರೀಕ್ಷೆಗಳನ್ನು ಆಧರಿಸಿವೆ ಎಂದು TRAI ತಿಳಿಸಿದೆ.
2024ರ ಅಕ್ಟೋಬರ್ 1ರಿಂದ ಜಾರಿಗೆ ಬಂದಿರುವ ಪ್ರಸ್ತುತ ಸೇವಾ ಗುಣಮಟ್ಟದ ನಿಯಮಗಳು, ತಂತ್ರಜ್ಞಾನ-ತಟಸ್ಥ ಚೌಕಟ್ಟು, ಪಾರದರ್ಶಕ ವರದಿ ವ್ಯವಸ್ಥೆ ಹಾಗೂ ಸೇವಾ ಗುಣಮಟ್ಟದ ಮೇಲ್ವಿಚಾರಣೆಗೆ ಹೊಸ ಮಾನದಂಡಗಳನ್ನು ಪರಿಚಯಿಸಿದ್ದವು.
ಈಗ ‘ಪ್ರವೇಶ ಸೇವೆ (ವೈರ್ಲೈನ್ ಮತ್ತು ವೈರ್ಲೆಸ್) ಹಾಗೂ ಬ್ರಾಡ್ಬ್ಯಾಂಡ್ (ವೈರ್ಲೆಸ್) ಸೇವೆಗಳ ಗುಣಮಟ್ಟ (ಮೊದಲ ತಿದ್ದುಪಡಿ) ನಿಯಮಗಳು-2026’ ಕರಡನ್ನು ಸಾರ್ವಜನಿಕ ಸಮಾಲೋಚನೆಗಾಗಿ TRAI ತನ್ನ ವೆಬ್ಸೈಟ್ನಲ್ಲಿ ಪ್ರಕಟಿಸಿದೆ.
ಕರಡು ತಿದ್ದುಪಡಿಗಳ ಕುರಿತು ಆಗಸ್ಟ್ 26, 2026ರೊಳಗೆ ಸಾರ್ವಜನಿಕರು ಮತ್ತು ಪಾಲುದಾರರಿಂದ ಲಿಖಿತ ಅಭಿಪ್ರಾಯಗಳನ್ನು ಆಹ್ವಾನಿಸಲಾಗಿದ್ದು, ಸೆಪ್ಟೆಂಬರ್ 7, 2026ರೊಳಗೆ ಪ್ರತಿ-ಅಭಿಪ್ರಾಯಗಳನ್ನು ಸಲ್ಲಿಸಲು ಅವಕಾಶ ನೀಡಲಾಗಿದೆ.