ನವದೆಹಲಿ: ಮುಂದಿನ ಪೀಳಿಗೆಯ ವೈರ್ಲೆಸ್ ತಂತ್ರಜ್ಞಾನವಾದ 6G ಕ್ಷೇತ್ರದಲ್ಲಿ ಜಾಗತಿಕ ನಾಯಕತ್ವ ಸಾಧಿಸುವ ನಿಟ್ಟಿನಲ್ಲಿ ಭಾರತ ಮಹತ್ವದ ಹೆಜ್ಜೆ ಇಟ್ಟಿದೆ. ಸುರಕ್ಷಿತ, ಸ್ಥಿತಿಸ್ಥಾಪಕ, ಮುಕ್ತ ಹಾಗೂ ಪರಸ್ಪರ ಕಾರ್ಯನಿರ್ವಹಿಸಬಹುದಾದ 6G ಜಾಲಗಳ ಅಭಿವೃದ್ಧಿಗೆ ಕರೆ ನೀಡಿರುವ 20ಕ್ಕೂ ಹೆಚ್ಚು ಸಮಾನ ಮನಸ್ಕ ರಾಷ್ಟ್ರಗಳ ಉಪಕ್ರಮಕ್ಕೆ ಭಾರತ ಬೆಂಬಲ ವ್ಯಕ್ತಪಡಿಸಿದೆ.
ಈ ಉಪಕ್ರಮದಡಿ 6G ಜಾಲಗಳನ್ನು ನಿರ್ಣಾಯಕ ಮೂಲಸೌಕರ್ಯವೆಂದು ಪರಿಗಣಿಸಿ, ಸೈಬರ್ ಭದ್ರತೆ, ಪೂರೈಕೆ ಸರಪಳಿ ಸ್ಥಿರತೆ, ಜಾಗತಿಕ ಮಾನದಂಡಗಳು ಹಾಗೂ ತಾಂತ್ರಿಕ ನಾವೀನ್ಯತೆಗೆ ಆದ್ಯತೆ ನೀಡಲು ರಾಷ್ಟ್ರಗಳು ಒಪ್ಪಿಕೊಂಡಿವೆ. ಭಾರತದ ಪರವಾಗಿ ದೂರಸಂಪರ್ಕ ಇಲಾಖೆ (DoT) ಮುಂದಿನ ಕ್ರಮಗಳನ್ನು ಸಮನ್ವಯಗೊಳಿಸಲಿದೆ.
ಭಾರತವು ತಂತ್ರಜ್ಞಾನ ಅಳವಡಿಸಿಕೊಳ್ಳುವ ದೇಶದಿಂದ ಜಾಗತಿಕ ತಂತ್ರಜ್ಞಾನ ಮತ್ತು ಮಾನದಂಡಗಳನ್ನು ರೂಪಿಸುವ ದೇಶವಾಗಿ ಹೊರಹೊಮ್ಮುವ ಗುರಿ ಹೊಂದಿದೆ. 6G ಜಾಗತಿಕ ಮಾನದಂಡಗಳು ಮತ್ತು ಪೇಟೆಂಟ್ಗಳಲ್ಲಿ ಶೇ.10ರಷ್ಟು ಕೊಡುಗೆ ನೀಡುವ ಮಹತ್ವಾಕಾಂಕ್ಷೆಯನ್ನು ಭಾರತ ಹೊಂದಿದೆ.
ಕೇಂದ್ರ ಸಂವಹನ ಸಚಿವ ಜ್ಯೋತಿರಾದಿತ್ಯ ಎಂ. ಸಿಂಧಿಯಾ ಅವರು 6G ಕ್ಷೇತ್ರದಲ್ಲಿ ಭಾರತವನ್ನು ಜಾಗತಿಕ ನಾಯಕನನ್ನಾಗಿ ರೂಪಿಸುವ ಗುರಿಯನ್ನು ಒತ್ತಿಹೇಳಿದ್ದಾರೆ. ಸಂವಹನ ಖಾತೆ ರಾಜ್ಯ ಸಚಿವ ಚಂದ್ರಶೇಖರ್ ಪೆಮ್ಮಸಾನಿ ಅವರು ದೇಶೀಯ ಟೆಲಿಕಾಂ ತಂತ್ರಜ್ಞಾನಗಳ ಸಾಮರ್ಥ್ಯವನ್ನು ಹೆಚ್ಚಿಸುವ ಅಗತ್ಯವನ್ನು ಪ್ರತಿಪಾದಿಸಿದ್ದಾರೆ.
ಸೆಪ್ಟೆಂಬರ್ 1 ಮತ್ತು 2ರಂದು ಅಮೆರಿಕದ G20 ಅಧ್ಯಕ್ಷತೆಯಲ್ಲಿ ಉತ್ತರ ಕೆರೊಲಿನಾದ ಚಾಪೆಲ್ ಹಿಲ್ನಲ್ಲಿ ನಡೆದ G20 ನಾವೀನ್ಯತೆ ಸಚಿವರ ಸಭೆಯಲ್ಲಿ ಭಾರತದ ಬೆಂಬಲ ಘೋಷಿಸಲಾಯಿತು.
6G ಅಭಿವೃದ್ಧಿಯಲ್ಲಿ ಸರ್ಕಾರಗಳು ಉದ್ಯಮ ಮತ್ತು ಶೈಕ್ಷಣಿಕ ಸಂಸ್ಥೆಗಳೊಂದಿಗೆ ಕೈಜೋಡಿಸಿ ಕಾರ್ಯನಿರ್ವಹಿಸಲಿವೆ. ಸುರಕ್ಷಿತ ಜಾಲ, ಸ್ಥಿತಿಸ್ಥಾಪಕ ಪೂರೈಕೆ ಸರಪಳಿ, ಸೈಬರ್ ಭದ್ರತೆ ಮತ್ತು ಜಾಗತಿಕ ತಾಂತ್ರಿಕ ಮಾನದಂಡಗಳ ರೂಪಿಸುವಿಕೆಗೆ ಸಹಕಾರ ನೀಡಲಿವೆ.
ಮುಂದಿನ ಒಂದು ತಿಂಗಳಿಂದ 12 ತಿಂಗಳ ಅವಧಿಯಲ್ಲಿ 6G ತಜ್ಞರ ನೇಮಕ, ಉದ್ಯಮ–ಶೈಕ್ಷಣಿಕ ಪಾಲುದಾರರ ಗುರುತಿಸುವಿಕೆ, ತಾಂತ್ರಿಕ ಅಡೆತಡೆಗಳ ಮೌಲ್ಯಮಾಪನ ಹಾಗೂ ಅಗತ್ಯ ಸಂಪನ್ಮೂಲಗಳ ಪರಿಶೀಲನೆ ನಡೆಸುವ ಗುರಿ ಹೊಂದಲಾಗಿದೆ. ಪ್ರಗತಿ ಪರಿಶೀಲನೆಗಾಗಿ 2027ರಲ್ಲಿ ಅನುಸರಣಾ ಸಭೆ ನಡೆಸಲು ಉದ್ದೇಶಿಸಲಾಗಿದೆ.
ಭಾರತದ ಭಾಗವಹಿಸುವಿಕೆ ‘ಭಾರತ್ 6G ವಿಷನ್’, ‘ಭಾರತ್ 6G ಅಲೈಯನ್ಸ್’ ಮತ್ತು ದೇಶೀಯ 4G–5G ತಂತ್ರಜ್ಞಾನ ಸ್ಟ್ಯಾಕ್ನಂತಹ ಪ್ರಯತ್ನಗಳಿಗೆ ಪೂರಕವಾಗಲಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
ಕೆನಡಾ, ಫ್ರಾನ್ಸ್, ಜರ್ಮನಿ, ಇಟಲಿ, ಜಪಾನ್, ದಕ್ಷಿಣ ಕೊರಿಯಾ, ಸ್ವೀಡನ್, ಬ್ರಿಟನ್ ಮತ್ತು ಅಮೆರಿಕ ಸೇರಿದಂತೆ ಹಲವು ರಾಷ್ಟ್ರಗಳು ಈ ಉಪಕ್ರಮಕ್ಕೆ ಬೆಂಬಲ ನೀಡಿವೆ.