ನಗೋಯಾ: ಏಷ್ಯನ್ ಗೇಮ್ಸ್ 2026ರ ಪುರುಷರ ಕಾಂಪೌಂಡ್ ತಂಡದ ವಿಭಾಗದಲ್ಲಿ ಚೀನಾವನ್ನು 238-237 ಅಂತರದಿಂದ ಮಣಿಸಿದ ಭಾರತ ಚಿನ್ನದ ಪದಕ ಗೆದ್ದುಕೊಂಡಿದೆ.
ಬುಧವಾರ ನಡೆದ ರೋಚಕ ಫೈನಲ್‌ನಲ್ಲಿ ಭಾರತದ ಕುಶಲ್ ದಲಾಲ್, ಸಾಹಿಲ್ ರಾಜೇಶ್ ಜಾಧವ್ ಹಾಗೂ ಗಣೇಶ್ ಮಣಿರತ್ನಂ ತಿರುಮುರು ಅವರು ಒತ್ತಡದ ನಡುವೆಯೂ ನಿಖರ ಪ್ರದರ್ಶನ ನೀಡಿ ಚೀನಾದ ತಂಡವನ್ನು ಮಣಿಸಿದರು.
ಈ ಗೆಲುವಿನೊಂದಿಗೆ ಏಷ್ಯನ್ ಗೇಮ್ಸ್‌ನಲ್ಲಿ ಕಾಂಪೌಂಡ್ ಬಿಲ್ಲುಗಾರಿಕೆಯಲ್ಲಿ ಭಾರತ ಸತತ ಮೂರನೇ ಬಾರಿಗೆ ಚಿನ್ನದ ಪದಕ ಗೆದ್ದ ಸಾಧನೆ ಮಾಡಿದೆ.
ಇದಕ್ಕೂ ಮುನ್ನ ಭಾರತದ ಮಹಿಳಾ ಕಾಂಪೌಂಡ್ ತಂಡವೂ ಚಿನ್ನದ ಪದಕ ಗೆದ್ದಿತ್ತು. ಚಿಖಿತಾ ತನಿಪಾರ್ಥಿ, ಪೃಥಿಕಾ ಪ್ರದೀಪ್ ಹಾಗೂ ಜ್ಯೋತಿ ಸುರೇಖಾ ವೆನ್ನಮ್ ಅವರ ತಂಡ ಫೈನಲ್‌ನಲ್ಲಿ ಚೀನಾವನ್ನು 238-234 ಅಂತರದಿಂದ ಸೋಲಿಸಿ ಪ್ರಶಸ್ತಿಯನ್ನು ಉಳಿಸಿಕೊಂಡಿತು.
ಮಿಶ್ರ ಕಾಂಪೌಂಡ್ ತಂಡದ ವಿಭಾಗದಲ್ಲೂ ಭಾರತ ಚಿನ್ನದ ಪದಕ ಗೆದ್ದಿತ್ತು. ಚಿಖಿತಾ ತನಿಪಾರ್ಥಿ ಮತ್ತು ಸಾಹಿಲ್ ಜಾಧವ್ ಅವರ ಜೋಡಿ ಈ ಸಾಧನೆ ಮಾಡಿದ್ದು, ಇದರೊಂದಿಗೆ ಭಾರತಕ್ಕೆ LA 2028 ಒಲಿಂಪಿಕ್ಸ್‌ಗೆ ಕೋಟಾ ಸ್ಥಾನ ಖಚಿತವಾಗಿದೆ.
ಪ್ರಧಾನಿ ಮೋದಿ ಅಭಿನಂದನೆ
ಪುರುಷರ ಕಾಂಪೌಂಡ್ ತಂಡದ ಚಿನ್ನದ ಪದಕದ ಸಾಧನೆಗೆ ಪ್ರಧಾನಿ ನರೇಂದ್ರ ಮೋದಿ ಅಭಿನಂದನೆ ಸಲ್ಲಿಸಿದ್ದಾರೆ.
ಕುಶಲ್ ದಲಾಲ್, ಸಾಹಿಲ್ ಜಾಧವ್ ಮತ್ತು ಗಣೇಶ್ ಮಣಿರತ್ನಂ ತಿರುಮುರು ಅವರ ಪ್ರದರ್ಶನವನ್ನು ಶ್ಲಾಘಿಸಿದ ಮೋದಿ, ರೋಚಕ ಫೈನಲ್‌ನಲ್ಲಿ ಮೂವರು ತೋರಿದ ನಿಖರತೆ ಮತ್ತು ತಂಡದ ಸಮನ್ವಯ ಗಮನಾರ್ಹವಾಗಿತ್ತು ಎಂದು ಹೇಳಿದ್ದಾರೆ.
ಭಾರತೀಯ ಬಿಲ್ಲುಗಾರಿಕೆಯ ಇತಿಹಾಸದಲ್ಲಿ ಈ ಸಾಧನೆ ಸ್ಮರಣೀಯವಾಗಿದ್ದು, ಮುಂದಿನ ಸ್ಪರ್ಧೆಗಳಲ್ಲೂ ಮೂವರು ಬಿಲ್ಲುಗಾರರಿಗೆ ಯಶಸ್ಸು ಸಿಗಲಿ ಎಂದು ಪ್ರಧಾನಿ ಹಾರೈಸಿದ್ದಾರೆ.