ನವದೆಹಲಿ: ಸುಧಾರಿತ ಕೋಶ (Cell) ಮತ್ತು ಜೀನ್ (Gene) ಚಿಕಿತ್ಸೆಗಳ ಸುರಕ್ಷತೆ ಹಾಗೂ ಗುಣಮಟ್ಟವನ್ನು ಖಚಿತಪಡಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರ ಔಷಧ ನಿಯಮಗಳು–1945ಕ್ಕೆ ತಿದ್ದುಪಡಿ ಮಾಡಿದ್ದು, ಈ ಚಿಕಿತ್ಸಾ ಉತ್ಪನ್ನಗಳನ್ನು ಕೇಂದ್ರೀಯ ಪರವಾನಗಿ ಅನುಮೋದನಾ ಪ್ರಾಧಿಕಾರ (CLAA) ವ್ಯಾಪ್ತಿಗೆ ತರಲು ನಿರ್ಧರಿಸಿದೆ.
ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಪ್ರಕಾರ, ಈ ಕ್ರಮದಿಂದ ಕೇಂದ್ರ ಹಾಗೂ ರಾಜ್ಯ ಔಷಧ ನಿಯಂತ್ರಣ ಸಂಸ್ಥೆಗಳ ಜಂಟಿ ಮೇಲ್ವಿಚಾರಣೆಯಲ್ಲಿ ದೇಶಾದ್ಯಂತ ಏಕರೂಪದ ನಿಯಂತ್ರಣ ವ್ಯವಸ್ಥೆ ಜಾರಿಯಾಗಲಿದೆ.
ಹೊಸ ಚೌಕಟ್ಟಿನಡಿ ಕಾಂಡಕೋಶ ಆಧಾರಿತ ಪುನರುತ್ಪಾದಕ ಚಿಕಿತ್ಸೆಗಳು, ರಕ್ತ ಕ್ಯಾನ್ಸರ್ ಚಿಕಿತ್ಸೆಗೆ ಬಳಸುವ CAR-T ಕೋಶ ಚಿಕಿತ್ಸೆ, ಆನುವಂಶಿಕ ಕಾಯಿಲೆಗಳು ಮತ್ತು ಕ್ಯಾನ್ಸರ್ಗೆ ಜೀನ್ ಬದಲಿ ಹಾಗೂ ಜೀನ್-ಸಂಪಾದನಾ ಚಿಕಿತ್ಸೆಗಳು, ಜೊತೆಗೆ ಪ್ರಾಣಿ ಅಂಗಾಂಶಗಳಿಂದ ತಯಾರಾಗುವ ಕ್ಸೆನೋಗ್ರಾಫ್ಟ್ ಉತ್ಪನ್ನಗಳೂ ಒಳಪಡಲಿವೆ.
ಈ ಅತ್ಯಾಧುನಿಕ ವೈದ್ಯಕೀಯ ತಂತ್ರಜ್ಞಾನಗಳು ಸಂಕೀರ್ಣ ಸ್ವರೂಪದ್ದಾಗಿರುವುದರಿಂದ ಕಠಿಣ ನಿಯಂತ್ರಣ ಮತ್ತು ಗುಣಮಟ್ಟದ ಪರಿಶೀಲನೆ ಅಗತ್ಯವಾಗಿದೆ ಎಂದು ಸಚಿವಾಲಯ ತಿಳಿಸಿದೆ.
ಹೊಸ ನಿಯಮಗಳಿಂದ ರೋಗಿಗಳ ಸುರಕ್ಷತೆ ಮತ್ತಷ್ಟು ಬಲಗೊಳ್ಳಲಿದ್ದು, ಸುಧಾರಿತ ವೈದ್ಯಕೀಯ ತಂತ್ರಜ್ಞಾನಗಳ ಜವಾಬ್ದಾರಿಯುತ ಬಳಕೆಗೆ ಉತ್ತೇಜನ ಸಿಗಲಿದೆ. ಜೊತೆಗೆ, ಭಾರತದ ಔಷಧ ನಿಯಂತ್ರಣ ವ್ಯವಸ್ಥೆ ಜಾಗತಿಕ ಗುಣಮಟ್ಟಕ್ಕೆ ಹೊಂದಿಕೊಳ್ಳಲಿದೆ ಎಂದು ಸರ್ಕಾರ ಹೇಳಿದೆ.
ಈಗಾಗಲೇ ಲಸಿಕೆಗಳು, ದೊಡ್ಡ ಪ್ರಮಾಣದ ಇಂಟ್ರಾವೆನಸ್ ದ್ರಾವಣಗಳು ಹಾಗೂ ಮರುಸಂಯೋಜಿತ ಡಿಎನ್ಎ ಆಧಾರಿತ ಔಷಧಿಗಳು CLAA ವ್ಯಾಪ್ತಿಯಲ್ಲಿದ್ದು, ಪರಿಷ್ಕೃತ ನಿಯಮಗಳಿಂದ ಈ ಪಟ್ಟಿಯನ್ನು ಮತ್ತಷ್ಟು ವಿಸ್ತರಿಸಲಾಗಿದೆ.