ನವದೆಹಲಿ: ಪ್ರಮುಖ ಉತ್ಪಾದಕ ರಾಜ್ಯಗಳಿಂದ ಹೊಸ ಖಾರಿಫ್ ಈರುಳ್ಳಿ ಮಾರುಕಟ್ಟೆಗೆ ಹೆಚ್ಚಿನ ಪ್ರಮಾಣದಲ್ಲಿ ಬರುತ್ತಿರುವುದು ಹಾಗೂ ಸರ್ಕಾರದ ಬಫರ್ ದಾಸ್ತಾನು ನಿರಂತರವಾಗಿ ಬಿಡುಗಡೆಯಾಗುತ್ತಿರುವ ಹಿನ್ನೆಲೆಯಲ್ಲಿ ದೇಶಾದ್ಯಂತ ಈರುಳ್ಳಿ ಪೂರೈಕೆ ಹೆಚ್ಚಳವಾಗಿದ್ದು, ಮುಂಬರುವ ವಾರಗಳಲ್ಲಿ ಬೆಲೆ ಮತ್ತಷ್ಟು ತಗ್ಗುವ ನಿರೀಕ್ಷೆಯಿದೆ.
ಕರ್ನಾಟಕ, ಆಂಧ್ರಪ್ರದೇಶ ಮತ್ತು ರಾಜಸ್ಥಾನದಿಂದ ಹೊಸ ಖಾರಿಫ್ ಈರುಳ್ಳಿ ಮಾರುಕಟ್ಟೆಗೆ ಬರಲಾರಂಭಿಸಿದೆ. ಸಂಗ್ರಹದಲ್ಲಿರುವ ಈರುಳ್ಳಿಯನ್ನೂ ಮಾರುಕಟ್ಟೆ ಬೇಡಿಕೆ ಪೂರೈಸಲು ಬಳಸಲಾಗುತ್ತಿದೆ. ಹಬ್ಬದ ಋತುವಿನ ಹಿನ್ನೆಲೆಯಲ್ಲಿ ಮುಂದಿನ ದಿನಗಳಲ್ಲಿ ಮಾರುಕಟ್ಟೆಗೆ ಈರುಳ್ಳಿ ಆಗಮನ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಸರ್ಕಾರ ತಿಳಿಸಿದೆ.
ಪ್ರಮುಖ ಉತ್ಪಾದಕ ಪ್ರದೇಶಗಳಲ್ಲಿ ಹವಾಮಾನ ಪರಿಸ್ಥಿತಿ ಅನುಕೂಲಕರವಾಗಿರುವ ಹಿನ್ನೆಲೆಯಲ್ಲಿ ದೇಶದ ಖಾರಿಫ್ ಈರುಳ್ಳಿ ಬಿತ್ತನೆ ಪ್ರದೇಶ ಕಳೆದ ವರ್ಷದ ಉತ್ತಮ ಮಟ್ಟಕ್ಕಿಂತ ಸುಮಾರು ಶೇ.5ರಷ್ಟು ಹೆಚ್ಚಾಗಿದೆ. ಕೊಯ್ಲು ಅವಧಿಯಲ್ಲಿ ಮಳೆಯ ಮುನ್ಸೂಚನೆಯೂ ಕೊಯ್ಲು, ಒಣಗಿಸುವಿಕೆ ಹಾಗೂ ಸಾಗಣೆಗೆ ಪೂರಕವಾಗುವ ನಿರೀಕ್ಷೆಯಿದೆ.
ಪ್ರಮುಖ ಉತ್ಪಾದಕ ರಾಜ್ಯವಾದ ಮಹಾರಾಷ್ಟ್ರದಲ್ಲೂ ಪೂರೈಕೆ ಹೆಚ್ಚಳದ ಪರಿಣಾಮ ಮಂಡಿ ಬೆಲೆಯಲ್ಲಿ ಇಳಿಕೆ ಕಂಡುಬಂದಿದೆ. ಸೆಪ್ಟೆಂಬರ್ 16ರಂದು ಕ್ವಿಂಟಾಲ್‌ಗೆ ಸುಮಾರು ₹4,030 ಇದ್ದ ಸರಾಸರಿ ಮಂಡಿ ಬೆಲೆ, ಅಕ್ಟೋಬರ್ 3ರಂದು ₹3,475ಕ್ಕೆ ಇಳಿದಿದ್ದು, ಸುಮಾರು ಶೇ.13ರಷ್ಟು ಕುಸಿತವಾಗಿದೆ.
ಚಿಲ್ಲರೆ ಮಾರುಕಟ್ಟೆಯಲ್ಲೂ ಬೆಲೆ ಇಳಿಕೆ ಕಂಡುಬಂದಿದೆ. ಕಳೆದ ಎರಡು ವಾರಗಳಲ್ಲಿ 126 ನಗರಗಳಲ್ಲಿ ಪ್ರತಿ ಕೆಜಿಗೆ ₹1ರಿಂದ ₹21ರವರೆಗೆ ಈರುಳ್ಳಿ ಬೆಲೆ ಕಡಿಮೆಯಾಗಿದೆ ಎಂದು ಸರ್ಕಾರ ತಿಳಿಸಿದೆ. ತಮಿಳುನಾಡು, ಮಧ್ಯಪ್ರದೇಶ, ಉತ್ತರ ಪ್ರದೇಶ, ಕರ್ನಾಟಕ, ಒಡಿಶಾ, ಆಂಧ್ರಪ್ರದೇಶ, ಬಿಹಾರ ಮತ್ತು ಪಶ್ಚಿಮ ಬಂಗಾಳ ಸೇರಿದಂತೆ ಪ್ರಮುಖ ಬಳಕೆದಾರ ರಾಜ್ಯಗಳಲ್ಲಿ ಬೆಲೆ ಇಳಿಕೆ ವರದಿಯಾಗಿದೆ.
ಬಳಕೆಯ ಕೇಂದ್ರಗಳಿಗೆ ಬಫರ್ ದಾಸ್ತಾನಿನ ಈರುಳ್ಳಿಯನ್ನು ತ್ವರಿತವಾಗಿ ತಲುಪಿಸುವ ಮೂಲಕ ಸರ್ಕಾರ ಪೂರೈಕೆ ಹೆಚ್ಚಿಸುತ್ತಿದೆ. 123 ನಗರಗಳಲ್ಲಿ ಎಂಟು ‘ಕಂದಾ ಎಕ್ಸ್‌ಪ್ರೆಸ್’ ಸೇವೆಗಳು ಮತ್ತು 467 ಟ್ರಕ್‌ಗಳ ಮೂಲಕ 2 ಲಕ್ಷ ಕ್ವಿಂಟಾಲ್‌ಗೂ ಹೆಚ್ಚು ಈರುಳ್ಳಿ ವಿತರಿಸಲಾಗಿದೆ.
ಹಬ್ಬದ ಋತುವಿನಲ್ಲಿ ಹೆಚ್ಚಿನ ಬೇಡಿಕೆಯಿರುವ ಮಾರುಕಟ್ಟೆಗಳಿಗೆ ಹೆಚ್ಚುವರಿ ಪ್ರಮಾಣದ ಈರುಳ್ಳಿ ಸಾಗಿಸಲು ರೈಲು ರೇಕ್‌ಗಳನ್ನೂ ಬಳಸುವ ಯೋಜನೆ ರೂಪಿಸಲಾಗಿದೆ.
ಹೊಸ ಖಾರಿಫ್ ಈರುಳ್ಳಿ ಆಗಮನ, ಹೆಚ್ಚಿದ ಬಿತ್ತನೆ ಪ್ರದೇಶ ಹಾಗೂ ಬಫರ್ ದಾಸ್ತಾನಿನ ನಿರಂತರ ಪೂರೈಕೆಯಿಂದ ಮುಂದಿನ ವಾರಗಳಲ್ಲಿ ಈರುಳ್ಳಿ ಲಭ್ಯತೆ ಸುಧಾರಿಸುವ ನಿರೀಕ್ಷೆಯಿದೆ. ಇದರಿಂದ ಬೆಲೆ ಏರಿಕೆಯ ಒತ್ತಡವೂ ಕಡಿಮೆಯಾಗುವ ಸಾಧ್ಯತೆಯಿದೆ ಎಂದು ಸರ್ಕಾರ ತಿಳಿಸಿದೆ.