ಬೆಂಗಳೂರು, ಸೆಪ್ಟೆಂಬರ್ 9: ಎಲೆಕ್ಟ್ರಾನಿಕ್ಸ್ ಮತ್ತು ಏರೋಸ್ಪೇಸ್ ಕ್ಷೇತ್ರಗಳಲ್ಲಿ ಮುಂದುವರಿದ ಉತ್ಪಾದನೆ ಹಾಗೂ ಉದ್ಯಮಕ್ಕೆ ಅಗತ್ಯವಿರುವ ಕೌಶಲ್ಯಗಳನ್ನು ಬೆಳೆಸುವ ಉದ್ದೇಶದಿಂದ ₹156 ಕೋಟಿ ವೆಚ್ಚದಲ್ಲಿ ನಿರ್ಮಿಸಿರುವ MSME ತಂತ್ರಜ್ಞಾನ ಕೇಂದ್ರ ದೇವನಹಳ್ಳಿಯಲ್ಲಿ ಸೆ.10ರಂದು ಉದ್ಘಾಟನೆಗೊಳ್ಳಲಿದೆ.
ಕರ್ನಾಟಕ ಸರ್ಕಾರ ಒದಗಿಸಿರುವ 10 ಎಕರೆ ಜಾಗದಲ್ಲಿ ಕೇಂದ್ರ MSME ಸಚಿವಾಲಯ ಈ ಸೌಲಭ್ಯವನ್ನು ಅಭಿವೃದ್ಧಿಪಡಿಸಿದೆ. ಕೇಂದ್ರ MSME ರಾಜ್ಯ ಸಚಿವೆ ಶೋಭಾ ಕರಂದ್ಲಾಜೆ ಉದ್ಘಾಟಿಸಲಿದ್ದು, ಸಚಿವರಾದ ಕೃಷ್ಣ ಬೈರೇಗೌಡ, ವಿಜಯಾನಂದ ಕಾಶಪ್ಪನವರ್ ಸೇರಿದಂತೆ ಹಿರಿಯ ಅಧಿಕಾರಿಗಳು ಹಾಗೂ ಉದ್ಯಮ ಪ್ರತಿನಿಧಿಗಳು ಭಾಗವಹಿಸಲಿದ್ದಾರೆ.
ಎಲೆಕ್ಟ್ರಾನಿಕ್ಸ್ ಸಿಸ್ಟಮ್ ವಿನ್ಯಾಸ ಮತ್ತು ಉತ್ಪಾದನೆ (ESDM) ಕ್ಷೇತ್ರಕ್ಕೆ ಕೇಂದ್ರ ಒತ್ತು ನೀಡಲಿದೆ. MSMEಗಳಿಗೆ ಆಧುನಿಕ ಯಂತ್ರೋಪಕರಣ, ಪ್ರಯೋಗಾಲಯ, ಪರೀಕ್ಷೆ, ವಿನ್ಯಾಸ ನೆರವು ಹಾಗೂ ತಾಂತ್ರಿಕ ಮತ್ತು ವ್ಯವಹಾರ ಸಲಹಾ ಸೇವೆಗಳನ್ನು ಒದಗಿಸಲಿದೆ.
ಸರ್ಫೇಸ್-ಮೌಂಟ್ ಟೆಕ್ನಾಲಜಿ (SMT) ಲೈನ್, 3-ಅಕ್ಷ ಮತ್ತು 5-ಅಕ್ಷ CNC ಯಂತ್ರಗಳು, ಸಂಯೋಜಕ ಉತ್ಪಾದನಾ ವ್ಯವಸ್ಥೆ ಹಾಗೂ EDM ಉಪಕರಣಗಳು ಕೇಂದ್ರದಲ್ಲಿರಲಿವೆ.
ಎಂಬೆಡೆಡ್ ಸಿಸ್ಟಮ್ಸ್, PCB ವಿನ್ಯಾಸ ಮತ್ತು ಜೋಡಣೆ, ಆಟೊಮೇಷನ್, ರೊಬೊಟಿಕ್ಸ್, ನಿರ್ವಹಣೆ ಮತ್ತು ದುರಸ್ತಿ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಉದ್ಯಮ ಆಧಾರಿತ ತರಬೇತಿ ನೀಡಲಾಗುತ್ತದೆ. ವರ್ಷಕ್ಕೆ 10 ಸಾವಿರ ತರಬೇತಿದಾರರಿಗೆ ತರಬೇತಿ ನೀಡುವ ಸಾಮರ್ಥ್ಯ ಕೇಂದ್ರಕ್ಕಿದೆ ಎಂದು ಸಚಿವಾಲಯ ತಿಳಿಸಿದೆ.
ತರಬೇತಿ, ಉತ್ಪಾದನೆ ಮತ್ತು ಆಡಳಿತಾತ್ಮಕ ಬ್ಲಾಕ್ಗಳ ಜತೆಗೆ ವಿದ್ಯಾರ್ಥಿಗಳ ವಸತಿ, ಸಿಬ್ಬಂದಿ ವಸತಿ ಹಾಗೂ ಕಾರ್ಯನಿರ್ವಾಹಕ ಹಾಸ್ಟೆಲ್ ಸೌಲಭ್ಯಗಳನ್ನೂ ಕೇಂದ್ರ ಹೊಂದಿದೆ.
ಬೆಂಗಳೂರಿನ ಏರೋಸ್ಪೇಸ್ ಮತ್ತು ಸೆಮಿಕಂಡಕ್ಟರ್ ಪರಿಸರ ವ್ಯವಸ್ಥೆಗೆ ಕೇಂದ್ರದಿಂದ ಮತ್ತಷ್ಟು ಉತ್ತೇಜನ ದೊರೆಯುವ ನಿರೀಕ್ಷೆಯಿದೆ. ವಿನ್ಯಾಸ, ಮೂಲಮಾದರಿ, ಉತ್ಪಾದನೆ, ತರಬೇತಿ ಮತ್ತು ಸಲಹಾ ಸೇವೆಗಳ ಮೂಲಕ ಕರ್ನಾಟಕದ MSME ವಲಯವನ್ನು ಬಲಪಡಿಸಿ ಉದ್ಯೋಗ ಸೃಷ್ಟಿಗೆ ಕೊಡುಗೆ ನೀಡುವುದು ಇದರ ಉದ್ದೇಶವಾಗಿದೆ.