ವಾಷಿಂಗ್ಟನ್: ಆರ್ಥಿಕ ಬೇಹುಗಾರಿಕೆ, ಸೈಬರ್ ದಾಳಿಗಳು ಮತ್ತು ವಾಣಿಜ್ಯ ಹೂಡಿಕೆಗಳ ಮೂಲಕ ಅಮೆರಿಕದ ಕೃತಕ ಬುದ್ಧಿಮತ್ತೆ (AI) ಹಾಗೂ ಇತರೆ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ಸ್ವಾಧೀನಪಡಿಸಿಕೊಳ್ಳಲು ಚೀನಾ ಪ್ರಯತ್ನಿಸುತ್ತಿದೆ ಎಂದು ಅಮೆರಿಕದ ಶಾಸಕರು ಎಚ್ಚರಿಕೆ ನೀಡಿದ್ದಾರೆ.
ಚೀನಾದ ಕಮ್ಯುನಿಸ್ಟ್ ಪಕ್ಷದ ಕುರಿತ ಹೌಸ್ ಸೆಲೆಕ್ಟ್ ಕಮಿಟಿ ವಿಚಾರಣೆಯಲ್ಲಿ ಮಾತನಾಡಿದ ರಕ್ಷಣಾ ಗುಪ್ತಚರ ಸಂಸ್ಥೆಯ ಮಾಜಿ ಕಾರ್ಯನಿರ್ವಾಹಕ ನಿರ್ದೇಶಕ ಡೇವಿಡ್ ಶೆಡ್, ಅಮೆರಿಕದ ತಾಂತ್ರಿಕ ಮತ್ತು ವಾಣಿಜ್ಯ ರಹಸ್ಯಗಳನ್ನು ಪಡೆಯಲು ಬೀಜಿಂಗ್ ವ್ಯಾಪಕ ಜಾಲವನ್ನು ನಿರ್ಮಿಸಿದೆ ಎಂದು ಆರೋಪಿಸಿದರು.
ಸೈಬರ್ ಬೇಹುಗಾರಿಕೆ, ಶೈಕ್ಷಣಿಕ ಸಹಯೋಗ, ಮಾನವ ಗುಪ್ತಚರ ಜಾಲ ಮತ್ತು ವಾಣಿಜ್ಯ ಹೂಡಿಕೆಗಳ ಮೂಲಕ ಚೀನಾ ತನ್ನ ತಾಂತ್ರಿಕ ಹಾಗೂ ಮಿಲಿಟರಿ ಸಾಮರ್ಥ್ಯವನ್ನು ವಿಸ್ತರಿಸುತ್ತಿದೆ ಎಂದು ಅವರು ಹೇಳಿದರು. ಕೃತಕ ಬುದ್ಧಿಮತ್ತೆ, ದೂರಸಂಪರ್ಕ, ಜೈವಿಕ ತಂತ್ರಜ್ಞಾನ, ಕ್ವಾಂಟಮ್ ಕಂಪ್ಯೂಟಿಂಗ್ ಮತ್ತು ಸುಧಾರಿತ ಶಸ್ತ್ರಾಸ್ತ್ರ ವ್ಯವಸ್ಥೆಗಳ ಕ್ಷೇತ್ರಗಳಲ್ಲಿ ಕಾರ್ಯನಿರ್ವಹಿಸುವ ಸಂಸ್ಥೆಗಳು ಪ್ರಮುಖ ಗುರಿಯಾಗಿವೆ ಎಂದರು.
ವಿಚಾರಣೆಯಲ್ಲಿ ಅಮೆರಿಕದ AI ಕಂಪನಿ ಆಂಥ್ರೊಪಿಕ್ ವಿರುದ್ಧ ಚೀನಾದ ಅಲಿಬಾಬಾ “ಡಿಸ್ಟಿಲೇಷನ್” ತಂತ್ರದ ಮೂಲಕ ಮಾಹಿತಿ ಸಂಗ್ರಹಿಸಲು ಯತ್ನಿಸಿದೆ ಎಂಬ ವರದಿಯೂ ಪ್ರಸ್ತಾಪವಾಯಿತು. ಈ ವಿಧಾನವು ದುಬಾರಿ AI ಮಾದರಿಗಳ ಜ್ಞಾನವನ್ನು ಕಡಿಮೆ ವೆಚ್ಚದಲ್ಲಿ ಮರುಸೃಷ್ಟಿಸಲು ನೆರವಾಗುತ್ತದೆ ಎಂದು ಶೆಡ್ ವಿವರಿಸಿದರು.
ಅಮೆರಿಕದ ಬೌದ್ಧಿಕ ಆಸ್ತಿ ಮತ್ತು ತಾಂತ್ರಿಕ ನಾವೀನ್ಯತೆಗಳನ್ನು ರಕ್ಷಿಸಲು ಸರ್ಕಾರ ಹಾಗೂ ಖಾಸಗಿ ವಲಯದ ನಡುವೆ ಹೆಚ್ಚಿನ ಸಹಕಾರ ಅಗತ್ಯವಿದೆ ಎಂದು ಅವರು ಒತ್ತಾಯಿಸಿದರು.