ಚಿತ್ರದುರ್ಗ: ಲಿಂಗೈಕ್ಯ ಶ್ರೀ ಶ್ರೀ ಶ್ರೀ 1108 ಶಿವಕುಮಾರ ಶಿವಾಚಾರ್ಯ ಮಹಾಸ್ವಾಮಿಗಳು ಭಕ್ತರ ಹೃದಯದಲ್ಲಿ ಶಾಶ್ವತ ಸ್ಥಾನ ಪಡೆದ ಮಹಾನ್ ವ್ಯಕ್ತಿತ್ವ. ಶಿಕ್ಷಣ, ಸಮಾಜ ಜಾಗೃತಿ ಹಾಗೂ ಆರ್ಥಿಕ ಸಬಲೀಕರಣಕ್ಕೆ ಆದ್ಯತೆ ನೀಡುವ ಮೂಲಕ ಸಮಾಜಕ್ಕೆ ಭದ್ರ ಬುನಾದಿ ಹಾಕಿದವರು ಎಂದು ವಿಧಾನ ಪರಿಷತ್ ಸದಸ್ಯ ಡಾ. ರವಿ ಸಿ.ಟಿ ಹೇಳಿದರು.
ಸಿರಿಗೆರೆಯ ಶ್ರೀಮದುಜ್ಜಯಿನಿ ಸದ್ಧರ್ಮ ಸಿಂಹಾಸನ ಬೃಹನ್ಮಠದಲ್ಲಿ ಪರಮಪೂಜ್ಯ ಶ್ರೀ ಶ್ರೀ ಶ್ರೀ ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳು ಹಾಗೂ ಪಂಡಿತಾರಾಧ್ಯ ಶ್ರೀ ಶ್ರೀ ಶ್ರೀ ಡಾ. ಶಿವಾಚಾರ್ಯ ಮಹಾಸ್ವಾಮಿಗಳ ದಿವ್ಯ ಸಾನ್ನಿಧ್ಯದಲ್ಲಿ ನಡೆದ ಲಿಂಗೈಕ್ಯ ಶ್ರೀ ಶ್ರೀ ಶ್ರೀ 1108 ಶಿವಕುಮಾರ ಶಿವಾಚಾರ್ಯ ಮಹಾಸ್ವಾಮಿಗಳ 35ನೇ ಶ್ರದ್ಧಾಂಜಲಿ ಸಮಾರಂಭದಲ್ಲಿ ಅವರು ಮಾತನಾಡಿದರು.
ಹಿರಿಯ ಜಗದ್ಗುರುಗಳೊಂದಿಗೆ ವೈಯಕ್ತಿಕ ಒಡನಾಟ ಇರದಿದ್ದರೂ, ಕಾಲೇಜು ದಿನಗಳಲ್ಲಿ ಅವರನ್ನು ದೂರದಿಂದ ಕಂಡಿದ್ದು ಹಾಗೂ ಕೆಲ ಸಂದರ್ಭಗಳಲ್ಲಿ ಅವರ ಮಾತುಗಳನ್ನು ಕೇಳಿದ್ದನ್ನು ಸ್ಮರಿಸಿದ ಡಾ. ರವಿ, ಹಿರಿಯರಿಂದ ಅವರ ಸಮಾಜಮುಖಿ ಕಾರ್ಯಗಳ ಕುರಿತು ಹಲವು ವಿಚಾರಗಳನ್ನು ತಿಳಿದುಕೊಂಡಿರುವುದಾಗಿ ಹೇಳಿದರು.
ಮಾತೃ ಹೃದಯದ ಮೃದುತ್ವದೊಂದಿಗೆ, ಸತ್ಯವನ್ನು ನಿಷ್ಠುರವಾಗಿ ಹೇಳುವ ಧೈರ್ಯವೂ ಅವರಲ್ಲಿತ್ತು. “ವಜ್ರಾದಪಿ ಕಠೋರಾಣಿ, ಮೃದೂನಿ ಕುಸುಮಾದಪಿ” ಎಂಬ ಮಾತಿಗೆ ಅವರ ವ್ಯಕ್ತಿತ್ವ ಸೂಕ್ತವಾಗಿತ್ತು ಎಂದು ಹೇಳಿದರು.
ಆರ್ಥಿಕವಾಗಿ ದುರ್ಬಲವಾಗಿದ್ದ ಮಠವನ್ನು ಸಮಾಜವನ್ನು ಮುನ್ನಡೆಸುವ ಶಕ್ತಿಯನ್ನಾಗಿ ರೂಪಿಸಿದ ಕೀರ್ತಿ ಹಿರಿಯ ಜಗದ್ಗುರುಗಳಿಗೆ ಸಲ್ಲುತ್ತದೆ. ಗ್ರಾಮೀಣ ಪ್ರದೇಶಗಳ ಮಕ್ಕಳಿಗೆ ಶಿಕ್ಷಣ ದೊರೆಯಬೇಕು ಎಂಬ ಉದ್ದೇಶದಿಂದ ಹಳ್ಳಿಹಳ್ಳಿಗಳಲ್ಲಿ ಪ್ರೌಢಶಾಲೆಗಳನ್ನು ಸ್ಥಾಪಿಸಲು ಅವರು ಆದ್ಯತೆ ನೀಡಿದ್ದರು ಎಂದು ಡಾ. ರವಿ ಹೇಳಿದರು.
ಆ ಕಾಲದಲ್ಲಿ ಗ್ರಾಮೀಣ ಭಾಗಗಳಲ್ಲಿ ಶಿಕ್ಷಣದ ಅವಕಾಶಗಳನ್ನು ವಿಸ್ತರಿಸುವ ಮೂಲಕ ಸಾಕ್ಷರ ಸಮಾಜ ನಿರ್ಮಾಣಕ್ಕೆ ಅವರು ಭದ್ರ ಬುನಾದಿ ಹಾಕಿದರು. “ಮಠ ನಮಗೇನು ಮಾಡುತ್ತದೆ” ಎಂಬ ಮನೋಭಾವದ ಬದಲು “ಮಠಕ್ಕೆ ನಾನೇನು ಮಾಡಬಲ್ಲೆ” ಎಂಬ ಚಿಂತನೆ ಬೆಳೆಸಿದವರು ಅವರು ಎಂದರು.
ಗ್ರಾಮೀಣ ಜನರು ಕೃಷಿ ಉತ್ಪನ್ನಗಳನ್ನು ಬೆಳೆಯುವುದಷ್ಟೇ ಅಲ್ಲದೆ, ಅವುಗಳಿಗೆ ಮಾರುಕಟ್ಟೆ ಕಂಡುಕೊಳ್ಳುವ ಹಾಗೂ ವ್ಯಾಪಾರ ಮಾಡುವ ಸಾಮರ್ಥ್ಯ ಬೆಳೆಸಿಕೊಳ್ಳಬೇಕು ಎಂಬ ಸಂದೇಶವನ್ನು ಹಿರಿಯ ಜಗದ್ಗುರುಗಳು ನೀಡುತ್ತಿದ್ದರು ಎಂದು ಡಾ. ರವಿ ಸ್ಮರಿಸಿದರು.
ಕಬ್ಬು, ಅಲಸಂಡೆ, ಕಡಲೆಕಾಯಿ, ಜೋಳ ಸೇರಿದಂತೆ ವಿವಿಧ ಬೆಳೆಗಳನ್ನು ಬೆಳೆದ ಬಳಿಕ ಅವುಗಳನ್ನು ಎಲ್ಲಿ ಮಾರಾಟ ಮಾಡುತ್ತೀರಿ ಎಂದು ಪ್ರಶ್ನಿಸಿ, ಮಾರುಕಟ್ಟೆ ಜ್ಞಾನ ಬೆಳೆಸಿಕೊಳ್ಳುವಂತೆ ಪ್ರೇರೇಪಿಸುತ್ತಿದ್ದರು. ಇದರಿಂದ ಹಲವರು ವ್ಯಾಪಾರ ಕ್ಷೇತ್ರದಲ್ಲಿ ಬೆಳೆಯಲು ಸಾಧ್ಯವಾಯಿತು ಎಂದು ಹೇಳಿದರು.
“ನೆತ್ತಿ ಉಳ್ಳವನು ಓದಬೇಕು, ರಟ್ಟೆ ಉಳ್ಳವನು ದುಡಿಯಬೇಕು, ಹೊಟ್ಟೆ ಉಳ್ಳವನು ಉಣ್ಣಬೇಕು” ಎಂಬ ಅವರ ಆಶೀರ್ವಚನ ಜನರಲ್ಲಿ ಕರ್ತವ್ಯ ಪ್ರಜ್ಞೆ ಹಾಗೂ ದುಡಿಯುವ ಮನೋಭಾವ ಬೆಳೆಸಿತ್ತು ಎಂದರು.
ಶಿಕ್ಷಣ ಮತ್ತು ಆಧುನಿಕತೆ ಬೆಳೆದಿದ್ದರೂ ಸಮಾಜದಲ್ಲಿ ಜಾತೀಯತೆಯ ಮನೋಭಾವ ಸಂಪೂರ್ಣವಾಗಿ ದೂರವಾಗಿಲ್ಲ. ಈ ಹಿನ್ನೆಲೆಯಲ್ಲಿ ಬಸವಣ್ಣನವರ ಆಶಯದಂತೆ ಹಿರಿಯ ಜಗದ್ಗುರುಗಳು ಸ್ವಾತಂತ್ರ್ಯಪೂರ್ವದಲ್ಲಿಯೇ ಮಠದಲ್ಲಿ ಸಹಪಂಕ್ತಿ ಭೋಜನದ ವ್ಯವಸ್ಥೆ ಜಾರಿಗೆ ತಂದಿದ್ದರು ಎಂದು ಡಾ. ರವಿ ಹೇಳಿದರು.
“ಸಮಾಜಕ್ಕೆ ಇಂದು ಹೊತ್ತಿರುವ ಮುಳ್ಳು ಜಾತೀಯತೆ. ಸಮಾಜಕ್ಕೆ ಹೊಕ್ಕಿರುವ ಮುಳ್ಳು ಅಸ್ಪೃಶ್ಯತೆ. ಈ ಮುಳ್ಳನ್ನು ಒಟ್ಟಾಗಿ ಕಿತ್ತು ಹಾಕದಿದ್ದರೆ ಸಮಾಜದ ಆರೋಗ್ಯಕ್ಕೆ ಅಪಾಯ” ಎಂದು ಅವರು ಹೇಳಿದರು.
ವೈವಿಧ್ಯತೆ ಸಮಾಜದ ಶಕ್ತಿಯಾಗಬೇಕು, ಒಡಕಿಗೆ ಕಾರಣವಾಗಬಾರದು. ಡಾ. ಬಿ.ಆರ್. ಅಂಬೇಡ್ಕರ್ ಅವರ ರಾಜಕೀಯ ಸಂವಿಧಾನದಂತೆ ಬಸವಣ್ಣನವರ ನೈತಿಕ ವಿಚಾರಧಾರೆಯೂ ಸಮಾಜದ ಬದುಕಿನ ಮಾರ್ಗದರ್ಶಿಯಾಗಬೇಕು ಎಂದರು.
“ಇವನಾರವ, ಇವನಾರವ ಎನ್ನದೆ, ಇವ ನಮ್ಮವ, ಇವ ನಮ್ಮವನೆಂದೆನಿಸಯ್ಯ” ಎಂಬ ಬಸವಣ್ಣನವರ ಆಶಯವನ್ನು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು. ಕಳವು, ಕೊಲೆ, ಸುಳ್ಳು, ಅಸಹ್ಯ ಭಾವನೆಗಳಿಂದ ದೂರವಿದ್ದು ನೈತಿಕ ಮೌಲ್ಯಗಳೊಂದಿಗೆ ಬದುಕುವ ಮೂಲಕ ಸಮಾಜವನ್ನು ಒಗ್ಗೂಡಿಸಬೇಕು ಎಂದು ಕರೆ ನೀಡಿದರು.
ಲಿಂಗೈಕ್ಯ ಸಿದ್ದಗಂಗಾ ಸ್ವಾಮೀಜಿ ಹಾಗೂ ಸಿದ್ದೇಶ್ವರ ಸ್ವಾಮೀಜಿಗಳ ನಂತರ ಮಾತೃಪೇಮದೊಂದಿಗೆ ಎಲ್ಲರನ್ನೂ ತಮ್ಮವರೆಂದು ಭಾವಿಸಿ, ಅಗತ್ಯ ಸಂದರ್ಭದಲ್ಲಿ ನ್ಯಾಯನಿಷ್ಠುರವಾಗಿ ಸತ್ಯವನ್ನು ಹೇಳುತ್ತಾ ಸಮಾಜವನ್ನು ಜಾಗೃತ ಸ್ಥಿತಿಯಲ್ಲಿ ಇಡುವ ಕಾರ್ಯವನ್ನು ಪರಮಪೂಜ್ಯ ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳು ಮಾಡುತ್ತಿದ್ದಾರೆ ಎಂದು ಡಾ. ರವಿ ಹೇಳಿದರು.
ಅಧಿಕಾರದಲ್ಲಿರುವವರು ಹಾಗೂ ಅಧಿಕಾರದಲ್ಲಿಲ್ಲದವರು ಎಂಬ ಭೇದವಿಲ್ಲದೆ ಸಿರಿಗೆರೆ ಮಠ ತಮ್ಮ ಮೇಲೆ ಸದಾ ಪ್ರೀತಿ ಮತ್ತು ಗೌರವ ತೋರಿಸಿದೆ. ಇದಕ್ಕಾಗಿ ತಾವು ಸದಾ ಋಣಿಯಾಗಿರುವುದಾಗಿ ತಿಳಿಸಿದ ಅವರು, ಅವಕಾಶ ಮತ್ತು ಶಕ್ತಿ ದೊರೆತಾಗ ಮಠ ತೋರಿಸಿದ ಮಾರ್ಗದಲ್ಲಿ ಕಾರ್ಯನಿರ್ವಹಿಸುವುದಾಗಿ ಹೇಳಿದರು.